ភ្នំពេញ៖ ក្រសួងពាណិជ្ជកម្មបានស្នើដល់អាជីវកម្ម សេវាកម្ម ពាណិជ្ជកម្មទាំងអស់ត្រូវអនុវត្តឱ្យខ្ជាប់ខ្ជួននូវការបិទតម្លៃលើទំនិញ និងសេវាកម្មដែលដាក់តាំងលក់ទាំងអស់ ដើម្បីសម្រួលអ្នកទិញទាំងអស់។
ក្នុងសេចក្ដីជូនដំណឹងចុះថ្ងៃទី២២ ខែមីនា ក្រសួងពាណិជ្ជកម្មបានលើកឡើងថា ការបិទថ្លៃទំនិញទាំងអស់ត្រូវដាក់ជាលុយរៀល លើកលែងតែអាជីវកម្ម និងសេវាកម្មមិនជាប់ពន្ធ តែត្រូវសុំការអនុញ្ញាតបិទថ្លៃទំនិញជារូបិយប័ណ្ណបរទេសនៅតាមអង្គភាពច្រកចេញចូលតែមួយ និងត្រូវធ្វើថ្មី ១ឆ្នាំម្ដង។
ក្រសួងពាណិជ្ជកម្មព្រមានថា គ្រប់អាជីវករ សេវាករ ពាណិជ្ជករទាំងឡាយណា ដែលមិនបានអនុវត្តតាមការណែនាំនេះត្រូវទទួលខុសត្រូវតាមច្បាប់ជាធរមាន។
ក្រសួងក៏បញ្ជាដល់ នាយកដ្ឋានអភិវឌ្ឍន៍វិស័យឯកជន អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្រ្កាបការក្លែងបន្លំ (ក.ប.ប) និងមន្ទីរពាណិជ្ជកម្មរាជធានីខេត្តទាំងអស់ ត្រូវរួមសហការជាមួយក្រសួង ស្ថាប័នមានសមត្ថកិច្ចចុះត្រួតពិនិត្យ និងណែនាំអំពីការបិទស្លាកតម្លៃជារៀងរាល់ខែ៕
